रायगड-अलिबाग | नैना (नवी मुंबई विमानतळ प्रभाव अधिसूचित क्षेत्र) परिसराच्या नियोजनबद्ध विकासातून सुमारे १५ लाख रोजगारनिर्मिती करण्याचे उद्दिष्ट ठेवण्यात आले आहे. यापैकी पाच लाख रोजगार उच्च वेतनाचे असतील आणि विकासातून निर्माण होणाऱ्या संधींमध्ये भूमिपुत्रांना प्राधान्य दिले जाईल. पनवेल तालुक्यातील शिरढोण येथे नैना परिसरातील विकासकामांचे भूमिपूजन करण्यात आले. तसेच नवी मुंबई आंतरराष्ट्रीय विमानतळाच्या पूर्वेकडील जोडणीसाठी विकसित करण्यात आलेल्या एसबीआर-९, बीआर-४, बीआर-५ आणि उरण बायपास पूल या प्रकल्पांचे लोकार्पण मुख्यमंत्री देवेंद्र फडणवीस यांच्या हस्ते झाले. यावेळी भूधारकांना मालमत्ता पत्रकांचे वाटपही करण्यात आले. कार्यक्रमाला उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, आणि सिडकोचे अधिकारी उपस्थित होते.

रोजगारनिर्मिती आणि पायाभूत सुविधा

नवी मुंबई आंतरराष्ट्रीय विमानतळ हा परिसराच्या आर्थिक विकासाला चालना देणारा घटक आहे. एकात्मिक विकास आराखड्याद्वारे या परिसराचा विकास केला जात आहे. एज्युसिटी, मेडिसिटी, स्पोर्ट्स सिटी, एरोसिटी आणि नॉलेज सिटी यांसारख्या संकल्पनांमुळे विविध आर्थिक आणि सामाजिक संधी निर्माण होतील. सुमारे ९५३ कोटी रुपये खर्चाच्या एसबीआर-९, बीआर-४ आणि बीआर-५ जोडणी प्रकल्पांमुळे पुणे, पनवेल, ठाणे आणि कल्याण भागातून विमानतळाकडे जाणारी वाहतूक वेगवान होईल. तसेच सुमारे ५० कोटी रुपये खर्चाच्या उरण बायपासमुळे शहरातील वाहतूक कोंडी कमी होणार आहे.

भूधारकांच्या समस्या व विकास

जमिनीशी संबंधित कागदपत्रे दिल्यानंतरच विकासकामांचे भूमिपूजन करण्याचा निर्णय घेण्यात आला होता. भूधारकांचे प्रश्न संपेपर्यंत राज्य सरकार पाठीशी राहील. नैना क्षेत्रातील जमीनधारकांच्या प्रश्नांना प्राधान्य देत विकास शुल्क आणि बेटरमेंट चार्ज शून्य करण्याचा निर्णय घेण्यात आला आहे. सिडकोमार्फत ९४ गावांच्या विकासाची जबाबदारी पार पाडली जात असून, स्थानिकांना रोजगाराच्या नवीन संधी उपलब्ध करून दिल्या जातील.

Source: Cosmo News Desk