नाशिक | ग्रामीण भागाचा शाश्वत विकास घडवून आणण्यासाठी प्रशासन, लोकप्रतिनिधी आणि नागरिकांनी एकजुटीने प्रयत्न करावेत, असे आवाहन मुख्यमंत्री देवेंद्र फडणवीस यांनी केले. नाशिक येथे आयोजित ‘मुख्यमंत्री समृद्ध पंचायतराज अभियान’ पुरस्कार वितरण सोहळ्यात ते बोलत होते. यंदा पावसाने ओढ दिल्याने निर्माण झालेल्या दुष्काळी परिस्थितीवर मात करण्यासाठी मुख्यमंत्री समृद्ध पंचायतराज अभियान २.० अंतर्गत जलसंधारणाच्या कामांना गती देणे ही काळाची गरज असल्याचे त्यांनी नमूद केले. गावागावांत पाण्याचा प्रत्येक थेंब साठवणे, बंधाऱ्यांची डागडुजी करणे आणि तलावांतील गाळ काढणे या कामांना प्राधान्य देण्याचे निर्देश त्यांनी यावेळी प्रशासनाला दिले.

दुष्काळ निवारण आणि पाणी नियोजनावर भर

मुख्यमंत्र्यांनी आपल्या भाषणात दुष्काळाचा सामना करण्यासाठी ग्रामपंचायतींनी पुढाकार घेण्याचे आवाहन केले. ते म्हणाले की, पावसाचे पाणी अडवून जमिनीत जिरवण्यासाठी मोठ्या प्रमाणात जलतारा संरचना उभारणे आवश्यक आहे. उपलब्ध पाण्याचा काटकसरीने वापर करून माणसांच्या आणि जनावरांच्या पिण्याच्या पाण्याला सर्वोच्च प्राधान्य द्यावे. शासन शेतकऱ्यांच्या पाठीशी असून गरज पडल्यास निकषांच्या पलीकडे जाऊन मदत दिली जाईल. ‘जी रामजी योजने’च्या माध्यमातून विविध शासकीय योजनांचे अभिसरण करून जलसंधारणाची कामे केली जातील, ज्यामुळे ग्रामीण भागात मोठ्या प्रमाणावर रोजगारही उपलब्ध होईल. तसेच, पशुधन टिकवण्यासाठी चारा उपलब्ध करून देण्याकडे सरकार विशेष लक्ष देणार असल्याचेही त्यांनी स्पष्ट केले.

उत्कृष्ट कामगिरी करणाऱ्या ग्रामपंचायतींचा सन्मान

या विशेष सोहळ्यात मुख्यमंत्री समृद्ध पंचायतराज अभियानाच्या पहिल्या टप्प्यातील विजेत्यांना गौरविण्यात आले. जिल्हा परिषद गटात नाशिक जिल्हा परिषदेने प्रथम क्रमांक पटकावला, तर पुणे आणि सांगली जिल्ह्यांनी अनुक्रमे द्वितीय व तृतीय स्थान मिळवले. पंचायत समिती स्तरावर नाशिकने प्रथम, खालापूरने द्वितीय आणि राहाता समितीने तृतीय क्रमांक मिळवला. ग्रामपंचायत पातळीवर पुणे जिल्ह्यातील अडाचीवाडी गावाने बाजी मारली. रत्नागिरीतील खामशेत आणि नाशिकमधील लाडूद यांना विभागून दुसरा, तर लातूरची उटी बु. आणि नागपूरची कोतवालबर्डी यांना विभागून तिसरा पुरस्कार मिळाला. ग्रामविकास मंत्री जयकुमार गोरे यांनी सांगितले की, या अभियानामुळे राज्यात २ हजार ७०६ किलोमीटर रस्त्यांची कामे पूर्ण झाली असून ६९ लाखांहून अधिक आयुष्मान कार्ड्सचे वाटप करण्यात आले आहे. सुशासन आणि लोकसहभागाच्या जोरावर गावांना स्वयंपूर्ण बनवणे हेच या अभियानाचे मुख्य उद्दिष्ट असल्याचे त्यांनी नमूद केले.

Source: Cosmo News Desk