मुंबई | नागरिकांना शासकीय सेवा सुलभ, गतिमान आणि पारदर्शक पद्धतीने मिळवून देण्यासाठी महाराष्ट्र शासनाकडून कृत्रिम बुद्धिमत्तेचा प्रभावी वापर करण्यावर भर दिला जात आहे. मंत्रालयात भारतीय लोक प्रशासन संस्था, महाराष्ट्र प्रादेशिक शाखेच्या वतीने ‘कृत्रिम बुद्धिमत्तेच्या युगातील नागरिक सेवा’ या विषयावर ‘प्रिल्यूड परिषद २०२६’चे आयोजन करण्यात आले होते. या परिषदेत प्रशासकीय कामकाजातील कृत्रिम बुद्धिमत्तेचा वापर, शासकीय योजनांची सुलभता आणि तंत्रज्ञानाधारित सेवा वितरणावर सविस्तर चर्चा करण्यात आली.

एकात्मिक डिजिटल सेवा प्रणाली आणि ‘महा आयडी’

परिषदेत माहिती देण्यात आली की, नागरिकांना विविध योजनांचा लाभ घेण्यासाठी वेगवेगळ्या संकेतस्थळांवर नोंदणी करावी लागू नये, यासाठी एकात्मिक डिजिटल सेवा प्रणाली विकसित केली जात आहे. ‘महा आयडी’च्या माध्यमातून एकच प्रवेश व्यवस्था निर्माण करण्यावर भर दिला जात आहे, ज्यामुळे नागरिकांना वारंवार संकेतशब्द मिळवण्याची गरज भासणार नाही. भविष्यात नागरिकांना नैसर्गिक भाषेत संवाद साधून अर्ज करण्याची सुविधा मिळण्याच्या दृष्टीनेही प्रयत्न सुरू आहेत. इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता विभागाच्या आयुक्त भुवनेश्वरी एस. यांनी याविषयी माहिती दिली.

‘महाविस्तार’ आणि ‘महा एआय’ उपक्रमांची माहिती

कृषी विभागाच्या नानाजी देशमुख कृषी संजीवनी प्रकल्पाच्या प्रकल्प संचालक मीनल करनवाल यांनी सांगितले की, ‘महाविस्तार’ उपक्रमाच्या माध्यमातून हवामानाचा अंदाज, पीक व्यवस्थापन, बाजारभाव आणि शासकीय योजनांची माहिती एकाच व्यासपीठावर उपलब्ध करून दिली जात आहे. तसेच, राष्ट्रीय सूचना विज्ञान केंद्राचे वैज्ञानिक अमोद सूर्यवंशी यांनी सांगितले की, शासकीय माहितीची गोपनीयता कायम राखत ‘महा एआय’ व्यासपीठ विकसित करण्यात आले आहे. याद्वारे पत्रलेखन, भाषांतर आणि दुबार नोंदी शोधण्यासारखी कामे केली जात आहेत.

Source: Cosmo News Desk