नाशिक | मेशी येथील दोन दिव्यांग बंधूंना ‘आम्ही मेषीकर’ व्हॉट्सॲप ग्रुपने मदतीचा हात देत स्वावलंबनाचा मार्ग दाखवला आहे. बापू वानखेडे आणि रवींद्र वानखेडे अशी या दोन्ही दिव्यांग भावांची नावे आहेत. वडिलांच्या निधनांतर कुटुंबाच्या उदरनिर्वाहाचा मोठा प्रश्न त्यांच्यासमोर उभा राहिला होता. शारीरिक मर्यादांमुळे त्यांना अन्य कामे करणे शक्य नसल्याने पुढील आयुष्य कसे जगावे, असा प्रश्न त्यांना सतावत होता. या दोघांच्या परिस्थितीची दखल घेत ग्रुपच्या सदस्यांनी ५० हजार रुपये जमा करून त्यांना रोजगार मिळवून दिला आहे.

वृत्ताची दखल आणि मदतीचा निर्धार

बापू वानखेडे आणि रवींद्र वानखेडे हे दोन्हीही जन्मतः अपंग आहेत. वडिलांच्या निधनांतर त्यांच्यासमोर पोटापाण्याचा प्रश्न निर्माण झाला होता. वृत्तपत्रात प्रसिद्ध झालेल्या वृत्तातून त्यांची व्यथा समोर आली. हे वृत्त ‘आम्ही मेषीकर’ व्हॉट्सॲप ग्रुपच्या सदस्यांपर्यंत पोहोचल्यानंतर दोन्ही बंधूंच्या परिस्थितीबाबत चर्चा झाली. गावातील तसेच नोकरीनिमित्त बाहेरगावी असलेल्या सदस्यांनी एकत्र येत त्यांना मदत करण्याचा ठाम निर्धार केला.

चहा व नाश्त्याचे हॉटेल सुरू

सदस्यांनी आपल्या ऐपतीनुसार आर्थिक मदत जमा करण्यास सुरुवात केली आणि काही दिवसांतच ५० हजार रुपयांचा निधी उभा राहिला. या जमा झालेल्या रकमेतून बापू आणि रवींद्र यांच्यासाठी चहा व नाश्त्याचे छोटेसे हॉटेल सुरू करून देण्यात आले. केवळ आर्थिक मदत न करता दोन्ही बंधूंना स्वतःच्या पायावर उभे राहता यावे, या उद्देशाने हा व्यवसाय सुरू करण्यात आला. या उपक्रमामुळे त्यांना रोजीरोटीचे साधन उपलब्ध झाले असून उदरनिर्वाहाचा प्रश्न सोडवण्यास मोठा हातभार लागला आहे. यापूर्वीही कोरोना काळात या ग्रुपने गावासाठी योगदान दिले होते.

Source: Cosmo News Desk