नाशिक | वणी पोलीस ठाण्याच्या हद्दीतील अंबानेर शिवारातील हॉटेल मल्हार येथे बनावट विदेशी दारू तयार करून विक्री करण्याच्या उद्देशाने साठा केल्याचा प्रकार समोर आला आहे. पोलिसांनी या ठिकाणी छापा टाकून मोठ्या प्रमाणावर बेकायदेशीर साठा जप्त केला आहे. नाशिक जिल्हा ग्रामीण पोलीस अधीक्षक व उपविभागीय उपअधीक्षक कळवण यांच्या सूचनेनुसार वणी पोलीस ठाण्याचे सहायक पोलीस निरीक्षक हेमंत फड यांच्या मार्गदर्शनाखाली ही कारवाई करण्यात आली.

हॉटेलवर पोलिसांची धाड आणि जप्त केलेले साहित्य

पोलिसांनी दिलेल्या माहितीनुसार, २४ ऑक्टोबर रोजी रात्री एक वाजण्याच्या सुमारास अंबानेर शिवारातील हॉटेल मल्हार येथे ही कारवाई झाली. संबंधितांकडे दारू निर्मिती व विक्रीसाठी आवश्यक परवाना नसताना ऑफिसर चॉइस ब्लू आणि रॉयल स्टॅग या ब्रँडच्या नावाचे लेबल लावलेल्या बाटल्यांमध्ये बनावट विदेशी दारू तयार करून विक्रीसाठी साठा केल्याचा संशय पोलिसांनी व्यक्त केला आहे. या कारवाईत विदेशी दारूच्या विविध ब्रँडच्या लेबल असलेल्या एकूण ६९९ सिलबंद बाटल्या, २० लिटर रसायन, रिकाम्या बाटल्या, दारू तयार करण्याचे साहित्य, एक अल्टो कार आणि मोबाईल असा एकूण ३ लाख ९१ हजार ७४६ रुपयांचा मुद्देमाल जप्त करण्यात आला आहे. यामध्ये ऑफिसर चॉइस ब्लू कंपनीच्या १८० मिली क्षमतेच्या ३६५ सिलबंद बाटल्या (किंमत ६०,३०० रुपये) आणि रॉयल स्टॅग कंपनीच्या ३३४ सिलबंद बाटल्या (किंमत ५८,७५० रुपये) यांचा समावेश आहे. याशिवाय २० लिटर रसायन असलेला प्लास्टिकचा कॅन, रिकाम्या बाटल्या, ग्रे रंगाची अल्टो कार व इतर साहित्य ताब्यात घेण्यात आले आहे.

गुन्हा दाखल आणि पुढील तपास सुरू

या प्रकरणी पोलीस कॉन्स्टेबल तुषार शाम सोनवणे यांनी फिर्याद दिली असून, वणी पोलीस ठाण्यात गुन्हा नोंदविण्यात आला आहे. सुमित अशोक कदम (वय ३२, रा. कोराटे, ता. दिंडोरी) आणि ज्ञानेश्वर नंदू नाठे (रा. निलवंडीपाडा, ता. दिंडोरी) यांच्याविरुद्ध हा गुन्हा दाखल करण्यात आला आहे. जप्त केलेल्या दारूची सत्यता, रसायनाचे स्वरूप आणि या प्रकरणामागे आणखी कोणाचा सहभाग आहे का, याबाबतचा पुढील तपास वणी पोलीस करीत आहेत.

Source: Cosmo News Desk