मुंबई | तेलंगणा राज्यातील थुमिडीहेट्टी जलसंपदा प्रकल्पाची उंची वाढविण्याबाबत मुख्यमंत्री ए. रेवंत रेड्डी यांनी केलेली विनंती आणि प्रकल्पाशी संबंधित मुद्द्यांचा महाराष्ट्र सरकारकडून स्वतंत्र अभ्यास केला जाणार आहे. सह्याद्री अतिथीगृह येथे मुख्यमंत्री देवेंद्र फडणवीस आणि तेलंगणाचे मुख्यमंत्री ए. रेवंत रेड्डी यांच्या नेतृत्वाखाली शिष्टमंडळाची बैठक पार पडली. या बैठकीत दोन्ही राज्यांच्या जलसंपदा प्रकल्पांच्या मुद्द्यांवर चर्चा करण्यात आली.

संयुक्त समितीची स्थापना आणि अभ्यास

तेलंगणाचे मुख्यमंत्री ए. रेवंत रेड्डी आणि जलसंपदा मंत्री उत्तमकुमार रेड्डी यांनी थुमिडीहेट्टी प्रकल्पाची उंची १४८ मीटरवरून १५२ मीटरपर्यंत वाढवण्यासाठी महाराष्ट्राने मान्यता द्यावी अशी विनंती केली. यावर दोन्ही राज्यांचे मुख्य सचिव आणि जलसंपदा विभागांचे सचिव यांची संयुक्त समिती नेमली जाईल. ही समिती तांत्रिक मुद्दे आणि महाराष्ट्रातील संभाव्य बुडीत क्षेत्र याचा सखोल अभ्यास करेल. महाराष्ट्रातील नागरिकांच्या हिताचे रक्षण करत तेलंगणाला सहकार्य करण्याची सकारात्मक भूमिका घेतली जाईल, असे मुख्यमंत्री देवेंद्र फडणवीस यांनी स्पष्ट केले.

केंद्रीय जल आयोगाची भूमिका आणि इतर मुद्दे

प्रकल्पस्थळ बदलल्यामुळे बुडीत क्षेत्रावर होणारा परिणाम, अभयारण्याचा समावेश आणि नदीपात्राबाहेरील आवश्यक जमिनीचे क्षेत्र यांचा अभ्यास केला जाईल. पाणी वाटप आणि वैधानिक मंजुरीशी संबंधित बाबी केंद्रीय जल आयोगाच्या कार्यक्षेत्रात येतात. आयोगाने राज्याचा अभिप्राय मागितल्यानंतर महाराष्ट्र तथ्यांच्या आधारे आपली भूमिका मांडेल. बैठकीस जलसंपदा मंत्री गिरीश महाजन, तेलंगणाचे जलसंपदा मंत्री उत्तमकुमार रेड्डी, मुख्य सचिव राजेश अग्रवाल, संजय जाजू आणि इतर वरिष्ठ अधिकारी उपस्थित होते.

Source: Cosmo News Desk