नाशिक | बागलाण तालुक्यातील तीव्र दुष्काळी परिस्थितीत पाण्याचा प्रत्येक थेंब महत्त्वाचा ठरत असताना, जयखेडा येथील एकलहरे शिवारातील (पहिलाड) डुवाच्या पाझर तलावातून दररोज हजारो लिटर पाणी गळतीमुळे वाया जात असल्याचा प्रकार समोर आला आहे. देखभालअभावी सांडवा व बांध्याला ठिकठिकाणी गळती लागल्यामुळे तलावातील पाणीसाठा झपाट्याने घटून १० टक्क्यांपेक्षा खाली आला आहे. यंदा अपुऱ्या पावसामुळे बागलाण तालुक्यात विहिरींनी तळ गासला असून खरीप पिके करपली आहेत. जुलै महिन्यात पूर्ण क्षमतेने भरलेला हा पाझर तलाव शेतकऱ्यांसाठी आशेचा किरण ठरला होता, परंतु दुरुस्तीकडे दुर्लक्ष झाल्यामुळे पाण्याचा अपव्यय होत आहे.

पाझर तलावाची दयनीय स्थिती आणि विद्यार्थ्यांची गैरसोय

अनेक वर्षांपासून दुरुस्ती व देखभाल न झाल्यामुळे तलावातून मोठ्या प्रमाणात पाणी वाहून जात आहे. परिणामी रब्बी हंगामासाठी आवश्यक असलेला साठा संपण्याच्या मार्गावर आहे. तलावाच्या पायथ्याशी असलेल्या जिल्हा परिषद शाळेकडे जाणाऱ्या मार्गावर पाझरणाऱ्या पाण्यामुळे विद्यार्थ्यांची मोठी गैरसोय होत आहे. तलावाच्या मातीच्या भरावर मोठ्या प्रमाणात झाडे-झुडपे वाढल्यामुळे भविष्यात भरावाला धोका निर्माण होण्याची शक्यता वर्तवली जात आहे. त्यामुळे तातडीने झाडे हटवून भराव्याची दुरुस्ती करण्याची मागणी ग्रामस्थांनी केली आहे. शेतकऱ्यांनी कांदा लागवड केली असून गळती अशीच सुरू राहिल्यास संपूर्ण हंगाम वाया जाईल आणि पाणीटंचाई तीव्र होईल अशी भीती व्यक्त केली आहे.

प्रशासन आणि अधिकाऱ्यांची भूमिका

जलसंधारण विभाग सटाणाचे कनिष्ठ अभियंता राहुल गुंजाळ यांनी सांगितले की, पाझर तलावाची प्रत्यक्ष पाहणी करून सविस्तर सर्व्हे करण्यात येईल आणि त्यानंतरचा अहवाल वरिष्ठांकडे पाठवून निधी उपलब्ध करण्यासाठी पाठपुरावा केला जाईल, तसेच लवकरात लवकर तलावाची दुरुस्ती केली जाईल. शेतकरी अरुण खैरनार यांनी जुलैमध्ये तलाव पूर्ण भरला होता परंतु गळतीमुळे पाणीसाठा झपाट्याने कमी होत असल्याने संबंधित विभागाने तातडीने दुरुस्ती करावी अशी मागणी केली आहे. या तलावाची साठवण क्षमता अंदाजे १०० ते १५० टीसीएम असून सध्या मोठ्या गळतीमुळे पाणीसाठा १० टक्क्यांपेक्षा कमी झाला आहे.

Source: Cosmo News Desk