नाशिक | आगामी सिंहस्थ कुंभमेळ्याच्या तयारीचा भाग म्हणून महापालिकेने महत्त्वाचे पाऊल उचलले आहे. साधू-महंत आणि भाविकांच्या निवासव्यवस्थेसाठी महापालिकेच्या स्थायी समितीने श्री दिंबर आखाडा व त्याच्याशी संलग्न आखाड्यांच्या परिसरात निवास सुविधा विकसित करण्याच्या प्रस्तावाला हिरवा कंदील दाखवला आहे.

निवास सुविधांसाठी ३ कोटी २८ लाखांचा खर्च

सिंहस्थ कुंभमेळ्याच्या काळात देश-विदेशातून लाखो भाविक, साधू-संत आणि महंत नाशिकमध्ये दाखल होत असतात. श्री दिंबर आखाडा हा एक प्रमुख आखाडा असल्याने या परिसरात मोठी गर्दी होते. या पार्श्वभूमीवर भाविक आणि साधूंना आवश्यक सुविधा उपलब्ध करून देण्यासाठी निवासव्यवस्था विकसित करण्याचा निर्णय घेण्यात आला होता. त्यानुसार, श्री दिंबर आखाड्याच्या परिसरात निवास व सुविधांसाठी ३ कोटी २८ लाख ५७ हजार ७६८ रुपयांच्या खर्चाला स्थायी समितीने अधिकृत मंजुरी दिली आहे.

प्रशासन आणि निविदा प्रक्रिया

कुंभमेळा आयुक्त आणि महापालिका आयुक्त यांच्या संयुक्त बैठकीत आखाड्यांमध्ये मूलभूत सुविधा आणि निवासव्यवस्था निर्माण करण्याचे निर्देश देण्यात आले होते. या निर्देशानुसार नाशिक-त्र्यंबकेश्वर कुंभमेळा प्राधिकरणाने या कामासाठी चार कोटी रुपयांच्या खर्चाला प्रशासकीय मान्यता दिली होती. त्यानंतर महापालिकेच्या सार्वजनिक बांधकाम विभागाने स्थापत्य आणि विद्युत कामांसाठी ३ कोटी ९९ लाख ९९ हजार ९२४ रुपयांचे प्राकलन तयार करून ई-निविदा प्रक्रिया राबवली.

राबवण्यात आलेल्या या ई-निविदा प्रक्रियेत मे. संजय वासुदेव गडाख यांची निविदा प्राकलन दरापेक्षा १८.५१३ टक्के कमी दराची ठरली. स्थायी समितीने या खर्चाला तसेच संबंधित कंत्राटदारासोबत करारनामा करण्यास अंतिम मंजुरी दिली असून, यामुळे कुंभमेळ्याच्या कामांना आता आणखी वेग मिळणार आहे.

Source: Cosmo News Desk