मुंबई | क्रीडा व युवक सेवा संचालनालय, महाराष्ट्र राज्य अंतर्गत जिल्हा क्रीडा परिषद आणि जिल्हा क्रीडा अधिकारी कार्यालय, मुंबई शहर यांच्या संयुक्त विद्यमाने १४ वर्षांखालील मुलींच्या राज्यस्तरीय शालेय कबड्डी स्पर्धा २०२६-२७ चे आयोजन करण्यात आले आहे. मुंबई शहर जिल्हा क्रीडा अधिकारी नीलिमा अडसूळ यांनी ही माहिती दिली आहे.

स्पर्धेचा कालावधी आणि ठिकाण

ही राज्यस्तरीय स्पर्धा १ ते ५ नोव्हेंबर २०२६ या कालावधीत पार पडणार आहे. सायन पश्चिम येथील धारावी येथील भारतरत्न राजीव गांधी जिल्हा क्रीडा संकुलात या स्पर्धेचे आयोजन करण्यात आले असून, सर्व सामने मॅटवर खेळविण्यात येणार आहेत. या स्पर्धेत महाराष्ट्रातील आठ विभागांमधून अंदाजे १५० खेळाडू सहभागी होणार आहेत.

राष्ट्रीय स्पर्धेसाठी निवड चाचणी

या स्पर्धेच्या अनुषंगाने ३ नोव्हेंबर २०२६ रोजी दुपारी ३ वाजता निवड चाचणी आयोजित करण्यात आली आहे. या निवड चाचणीच्या माध्यमातून हरियाणा येथे आयोजित करण्यात येणाऱ्या राष्ट्रीय शालेय कबड्डी स्पर्धेसाठी महाराष्ट्राच्या संघाची निवड केली जाणार आहे. मुंबई शहरात होत असलेल्या या स्पर्धेचे यशस्वी आयोजन करण्यासाठी जिल्हाधिकाऱ्यांच्या मार्गदर्शनाखाली जिल्हा क्रीडा अधिकारी कार्यालयामार्फत आवश्यक नियोजन केले जात आहे.

Source: Cosmo News Desk