मुंबई | राज्यातील एचआयव्ही प्रतिबंध, चाचणी, उपचार आणि काळजी सेवा अधिक सक्षम करण्यासाठी ‘मोबिलायझेशन फॉर एड्स सुरक्षा’ (एमएएस) हा उपक्रम राबविण्यात येत आहे. राष्ट्रीय एड्स नियंत्रण संस्थेच्या (नॅको) वतीने देशभर सुरू असलेल्या या उपक्रमाची महाराष्ट्रात ७ एप्रिल २०२६ रोजी अंमलबजावणी सुरू झाली. या उपक्रमाच्या अवघ्या सहा महिन्यांच्या कालावधीत राज्यातील धुळे, नंदुरबार, छत्रपती संभाजीनगर, जालना, चंद्रपूर आणि सांगली या सहा जिल्ह्यांनी निर्धारित केलेली तिन्ही उद्दिष्टे पूर्ण करून ‘सुरक्षित’ श्रेणीमध्ये स्थान मिळवले आहे. याशिवाय, राज्यातील इतर २३ जिल्ह्यांनी तीनपैकी दोन उद्दिष्टे साध्य करून ‘सक्षम’ श्रेणीमध्ये महत्वपूर्ण प्रगती केली आहे. उपक्रमाची सुरुवात झाली तेव्हा राज्यात केवळ एक जिल्हा ‘सक्षम’ आणि ३५ जिल्हे ‘संघर्षशील’ श्रेणीमध्ये होते.
उद्दिष्टांची वर्गवारी आणि ९५:९५:९५ चे स्वरूप
या उपक्रमांतर्गत जिल्ह्यांच्या कामगिरीचे मूल्यमापन करण्यासाठी विशेष निकष ठरवण्यात आले आहेत. शून्य किंवा केवळ एक उद्दिष्ट साध्य करणारे जिल्हे ‘संघर्षशील’, दोन उद्दिष्टे साध्य करणारे जिल्हे ‘सक्षम’ आणि तिन्ही उद्दिष्टे पूर्ण करणारे जिल्हे ‘सुरक्षित’ श्रेणीत समाविष्ट केले जातात. या अभियानांतर्गत ९५:९५:९५ अशी तीन मुख्य उद्दिष्टे ठेवण्यात आली आहेत. पहिल्या ९५ नुसार एचआयव्हीसह जगणाऱ्या एकूण व्यक्तींपैकी ९५ टक्के लोकांना त्यांच्या संसर्गस्थितीची माहिती असणे गरजेचे आहे. दुसऱ्या ९५ अंतर्गत निदान झालेल्यांपैकी ९५ टक्के व्यक्तींनी नियमित अँटिरेट्रोव्हायरल उपचार (एआरटी) घेणे अपेक्षित आहे. तर तिसऱ्या ९५ च्या माध्यमातून उपचार घेणाऱ्या ९५ टक्के व्यक्तींचा विषाणुभार दडपला जाऊन नियंत्रणात येणे अभिप्रेत आहे. ही उद्दिष्टे गाठण्यासाठी मूनलाइट कॅम्पेन, इंडेक्स टेस्टिंग, खासगी वैद्याकीय व्यावसायिकांचा सहभाग आणि नियमित समुपदेशन यांसारखे उपाय राबवले जात आहेत.
भविष्यातील ध्येय आणि प्रशासकीय सहभाग
राज्यातील सर्व ३६ जिल्ह्यांनी आगामी १ डिसेंबर २०२६ पर्यंत ही सर्व उद्दिष्टे पूर्ण करण्याचे महत्त्वाकांक्षी ध्येय समोर ठेवले आहे. या यशात जिल्हाधिकारी, जिल्हा परिषदेचे मुख्य कार्यकारी अधिकारी, जिल्हा शल्यचिकित्सक, आरोग्य अधिकारी, विविध केंद्रे आणि भागीदार संस्थांचे मोठे योगदान आहे. शहरी आरोग्य आयुक्त तथा प्रकल्प संचालक डॉ. सुनील भोकरे यांनी या उपक्रमामुळे राज्य उद्दिष्टपूर्तीकडे वेगाने वाटचाल करत असल्याचे सांगितले आहे. दरम्यान, आरोग्यमंत्री प्रकाश आबिटकर यांनीही या उल्लेखनीय कामगिरीबद्दल सर्व अधिकारी, कर्मचारी व यंत्रणांचे अभिनंदन केले असून, सुरक्षित व आरोग्यदायी महाराष्ट्र घडवण्यासाठी आरोग्य विभाग पूर्णपणे कटिबद्ध असल्याचे स्पष्ट केले आहे.
Source: Cosmo News Desk
