मुंबई | कल्याण तालुक्यातील मौजे चिकणघर येथील बुद्धभूमी फाउंडेशनच्या जमिनीसंदर्भात सामोपचाराने कार्यवाही करण्यात यावी, असे निर्देश विधानसभा उपाध्यक्ष अण्णा बनसोडे यांनी दिले आहेत. विधानभवनात पार पडलेल्या एका उच्चस्तरीय बैठकीत ते बोलत होते. या बैठकीत कल्याण तालुक्यातील मौजे चिकणघर येथील बुद्धभूमी फाउंडेशनच्या जमिनीबाबत आणि बुद्धभूमी आंतरराष्ट्रीय बौद्ध पर्यटन केंद्र विकसित करण्याच्या मुद्यांवर सविस्तर चर्चा करण्यात आली.

जमीन भाडेपट्ट्याने देण्याबाबत व सातबारा नोंदणीच्या सूचना

आढावा बैठकीत संबंधित जमीन कायमस्वरूपी भाडेपट्ट्याने देण्याबाबत तसेच त्यासंदर्भातील नोंद सातबारा उताऱ्यावर घेण्यासाठी आवश्यक प्रस्ताव त्वरित सादर करण्याच्या सूचना विधानसभा उपाध्यक्ष अण्णा बनसोडे यांनी संबंधित अधिकाऱ्यांना दिल्या. तसेच, विकास कामांमुळे बुद्धभूमी फाउंडेशनचे काही नुकसान झाले असल्यास, ते नुकसान संबंधित कंत्राटदाराकडून भरून घेण्यात यावे, असे स्पष्ट निर्देशही त्यांनी या बैठकीदरम्यान दिले आहेत.

बैठकीस अधिकारी व प्रतिनिधींची उपस्थिती

विधानसभा उपाध्यक्ष अण्णा बनसोडे यांच्या अध्यक्षतेखाली झालेल्या या महत्त्वपूर्ण बैठकीस कल्याण-डोंबिवली महानगरपालिका आणि एमएमआरडीएचे संबंधित अधिकारी उपस्थित होते. याशिवाय, बैठकीमध्ये बुद्धभूमी फाउंडेशनचे प्रतिनिधी देखील सहभागी झाले होते. या सर्व संबंधित विभागांच्या समन्वयातून या प्रकरणावर योग्य ती कार्यवाही केली जाणार आहे.

Source: Cosmo News Desk