सिंधुदुर्ग | भारताचे पहिले गृहमंत्री आणि लोहपुरुष सरदार वल्लभभाई पटेल यांच्या १५१ व्या जयंतीनिमित्त आयोजित राष्ट्रीय एकता परेडच्या पार्श्वभूमीवर देशातील विविध राज्ये व केंद्रशासित प्रदेशांच्या पोलीस दलांमार्फत काढण्यात आलेल्या राष्ट्रीय मोटरसायकल रॅलीचे सिंधुदुर्ग जिल्ह्यातील बांधा येथे आगमन झाले आहे. राज्याचे मत्स्यव्यवसाय व बंदरे विकास मंत्री तथा जिल्ह्याचे पालकमंत्री नितेश राणे यांच्या प्रमुख उपस्थितीत या रॅलीचे जोरदार स्वागत करण्यात आले. पोलीस दल आणि विद्यार्थ्यांच्या उपस्थितीत तुतारी आणि ढोल-ताशांच्या गजरात तसेच पुष्पवृष्टी करून रॅलीतील सहभागी पोलीस अधिकारी व रायडर्स यांचे स्वागत करण्यात आले. लक्षद्वीप, केरळ, कर्नाटक आणि गोवा या राज्यांमधून आलेले पोलीस अधिकारी, अंमलदार आणि रायडर्स या रॅलीत सहभागी झाले आहेत. राष्ट्रीय एकात्मतेची भावना दृढ करणे आणि ‘फाईट अगेन्स्ट ड्रग्ज’ या घोषवाक्याद्वारे अमली पदार्थांच्या दुष्परिणामांविषयी जनजागृती करणे हा या रॅलीचा मुख्य उद्देश आहे.

रॅलीचा उद्देश आणि जनजागृती उपक्रम

बांधा येथील स्वागत कार्यक्रमात बोलताना पालकमंत्री नितेश राणे यांनी लक्षद्वीप, केरळ, कर्नाटक आणि गोवा येथून आलेल्या सर्व पोलीस अधिकारी, अंमलदार आणि रायडर्स यांचे सिंधुदुर्ग जिल्ह्याच्या वतीने स्वागत केले. अमली पदार्थांविरोधातील लढा ही आजच्या काळाची गरज असून, देश अमली पदार्थमुक्त करण्याच्या उद्देशाने राबविण्यात येणाऱ्या या अभियानाला सर्वांनी पाठबळ द्यावे, असे आवाहन त्यांनी केले. या रॅलीच्या माध्यमातून अमली पदार्थांविरोधातील जनजागृतीला चालना मिळत असल्याचा विश्वास त्यांनी व्यक्त करत सर्व रायडर्सना पुढील प्रवासासाठी शुभेच्छा दिल्या आणि राज्यातील पुढील प्रवासाला सुरुवात होताना मान्यवरांनी हिरवा झेंडा दाखवला. जिल्ह्यातील कुडाळ हायस्कूल, पुष्पसेन ज्ञानपीठ, हुमरमळा तसेच जिल्हा मुख्यालय परिसरासह विविध ठिकाणी या रॅलीच्या माध्यमातून अमली पदार्थांविरोधातील लढ्याचा संदेश देण्यात आला. विद्यार्थ्यांच्या सहभागामुळे तरुण पिढीपर्यंत हा संदेश पोहोचविण्यास मदत झाली असून, तरुणाईला या व्यसनाच्या विळख्यापासून दूर ठेवण्यासाठी जनजागृती आणि सामाजिक सहभाग महत्त्वाचा असल्याचे अधोरेखित करण्यात आले.

मान्यवरांची उपस्थिती आणि राष्ट्रीय एकता दिवस

गुजरात मधील केवडिया येथील ‘स्टॅच्यू ऑफ युनिटी’ येथे ३१ ऑक्टोबर २०२६ रोजी आयोजित राष्ट्रीय एकता परेडच्या पार्श्वभूमीवर ही रॅली काढण्यात आली आहे. राष्ट्रीय एकता दिवसाच्या निमित्ताने आयोजित या रॅलीमुळे सरदार वल्लभभाई पटेल यांच्या राष्ट्रीय एकात्मतेच्या विचारांना उजाळा मिळण्यासोबतच अमली पदार्थांविरोधातील जनजागृतीचा संदेश व्यापक स्वरूपात पोहोचत आहे. या स्वागत प्रसंगी जिल्हा परिषद अध्यक्ष प्रमोद कामत, जिल्हाधिकारी तृप्ती धोडमिसे, पोलीस अधीक्षक डॉ. मोहन दहिकर, अपर पोलीस अधीक्षक नयोमी साटम, उपाध्यक्ष दादा साईल, जिल्हा बँक अध्यक्ष मनीष दळवी यांच्यासह विविध पोलीस अधिकारी, कर्मचारी, विद्यार्थी व नागरिक मोठ्या संख्येने उपस्थित होते.

Source: Cosmo News Desk