मुंबई | छत्रपती संभाजीनगर जिल्ह्यातील सिल्लोड आणि सोयगाव तालुक्यांतील पाणीपुरवठा योजनांची कामे प्राधान्याने आणि वेगाने पूर्ण करण्याचे निर्देश पाणीपुरवठा व स्वच्छतामंत्री गुलाबराव पाटील यांनी मंत्रालयात आयोजित आढावा बैठकीत दिले आहेत. या योजना व्यापक जनहिताच्या असून त्या पूर्ण करणे शासनाची प्राथमिकता असल्याचे त्यांनी नमूद केले. योजनांच्या अंमलबजावणीतील स्थानिक अडचणी संबंधित यंत्रणांशी समन्वय साधून दूर करण्याचे निर्देश त्यांनी दिले.

या बैठकीस आमदार अब्दुल सत्तार, पाणीपुरवठा व स्वच्छता विभागाचे अपर मुख्य सचिव पराग जैन-नैनुटिया, जल जीवन मिशनच्या अतिरिक्त सह अभियान संचालक श्रीमती दीपाली देशपांडे-सावेडकर यांच्यासह संबंधित सर्व विभागाचे अधिकारी उपस्थित होते. नागरिकांना नियमित आणि पुरेसा पाणीपुरवठा उपलब्ध करून देण्यासाठी सर्व संबंधित विभागांनी समन्वयाने काम करणे आवश्यक असल्याचे मंत्री पाटील यांनी स्पष्ट केले.

सिल्लोड तालुक्यातील १०७ गावांच्या ग्रीड योजनेचा आढावा

जलजीवन मिशनअंतर्गत सिल्लोड तालुक्यातील १०७ गावांसाठी मंजूर ग्रीड पाणीपुरवठा योजनेचा बैठकीत आढावा घेण्यात आला. बुलढाणा जिल्ह्यातील देऊळगाव राजा तालुक्यातील खडकपूर्णा धरण हा या योजनेचा जलस्रोत आहे. या योजनेच्या कामाची भौतिक प्रगती ८८.८३ टक्के झाली असून, उर्वरित कामे पूर्ण करण्यासाठी आवश्यक समन्वय साधून कार्यवाहीला गती देण्याचे निर्देश देण्यात आले.

सोयगाव तालुक्यातील जलजीवन मिशनअंतर्गत पाणीपुरवठा योजनांच्या अंमलबजावणीसाठी जलसंपदा विभागाशी समन्वय साधणे गरजेचे असल्याने, यासंदर्भात संबंधित विभागांची संयुक्त बैठक घेण्यात येणार आहे. याद्वारे पाणीपुरवठ्याशी निगडित प्रश्न मार्गी लावून कामांना गती दिली जाणार असल्याचे सांगण्यात आले.

अजिंठा लेणी परिसरातील पाणीपुरवठा

सोयगाव तालुक्यातील फर्दापूर अजिंठा लेणी सुधारात्मक पाणीपुरवठा योजनेचा आढावा यावेळी घेण्यात आला. या योजनेतील जलवाहिन्या बदलणे, जलशुद्धीकरण केंद्राची दुरुस्ती व नूतनीकरण, तसेच पंपिंग यंत्रणांशी संबंधित कामे पूर्ण झाली आहेत. अजिंठा लेणी हे जागतिक वारसास्थळ असल्याने या परिसरातील पाणीपुरवठा सुरळीत ठेवण्यासाठी संबंधित यंत्रणांनी समन्वयाने कार्यरत राहावे असे निर्देश देण्यात आले.

स्थानिक स्वरूपाच्या अडचणींमुळे कामांच्या प्रगतीवर परिणाम होत असल्यास जिल्हाधिकारी, पोलीस अधीक्षक आणि जिल्हा परिषदेचे मुख्य कार्यकारी अधिकारी यांच्याशी संपर्क साधून त्या सोडविल्या जाव्यात, असे मंत्री पाटील यांनी बैठकीत सांगितले.

Source: Cosmo News Desk