मुंबई | आदिवासी विकासमंत्री डॉ. अशोक वुईके यांनी जनजातीय गौरव दिन सप्ताहाच्या माध्यमातून आदिवासी समाजाच्या शेवटच्या घटकापर्यंत शासकीय योजनांचा लाभ पोहोचवण्याचे निर्देश दिले आहेत. भगवान बिरसा मुंडा यांच्या जयंतीनिमित्त येत्या ११ ते १८ नोव्हेंबर या कालावधीत जनजातीय गौरव दिन सप्ताहाचे आयोजन करण्यात येणार आहे. या सप्ताहाच्या नियोजनासंदर्भात शासकीय निवासस्थानी एका बैठकीचे आयोजन करण्यात आले होते. या बैठकीस विभागाचे सचिव विजय वाघमारे, आदिवासी विकास आयुक्त लीना बनसोड यांच्यासह नाशिक, ठाणे, नागपूर आणि अमरावती विभागांचे अपर आयुक्त आणि विविध जिल्ह्यांचे प्रकल्प अधिकारी ऑनलाइन उपस्थित होते.

सप्ताहाचे नियोजन आणि लोकसहभाग वाढवण्यावर भर

या सप्ताहाच्या आयोजनात लोकसहभाग वाढवणे, लाभार्थ्यांशी थेट संवाद साधणे आणि विविध माध्यमांद्वारे उपक्रमांची व्यापक प्रसिद्धी करण्याचे निर्देश देण्यात आले आहेत. आदिवासी समाजाच्या सर्वांगीण विकासासाठी राबविण्यात येणाऱ्या योजनांची माहिती तळागाळापर्यंत पोहोचवणे, पात्र लाभार्थ्यांना योजनांशी जोडणे आणि स्थानिक प्रश्न सोडवण्यासाठी समन्वय साधणे आवश्यक आहे. सर्व प्रकल्प अधिकाऱ्यांनी स्थानिक परिस्थितीनुसार सविस्तर कार्यक्रम आराखडा तयार करावा. लोकप्रतिनिधींना विश्वासात घेऊन कार्यक्रमांचे नियोजन करावे आणि जिल्हा माहिती अधिकारी यांच्या समन्वयाने पत्रकार परिषदांचे आयोजन करावे, असे सांगण्यात आले आहे.

विविध उपक्रम आणि आदिवासी समूहांपर्यंत पोहोचण्याचे निर्देश

धरती आबा जनजातीय ग्राम उत्कर्ष अभियान, न्यूक्लिअस बजेट आणि जिल्हा नियोजन समितीच्या योजनांच्या लाभार्थ्यांशी संवाद साधण्यावर भर देण्यात आला आहे. आदिवासी स्वातंत्र्यसैनिकांच्या स्मारकांची व पुतळ्यांची स्वच्छता, अभिवादन कार्यक्रम, शोभायात्रा आणि दीपोत्सव आयोजित करण्याचे निर्देश आहेत. वनहक्कधारकांच्या समस्यांसाठी शिबिरे, आरोग्य तपासणी, तसेच कातकरी, कोलाम, माडिया आणि पारधी यांसारख्या समूहांपर्यंत पोहोचून जात प्रमाणपत्र, आधार नोंदणी आणि शाळाबाह्य विद्यार्थ्यांचे प्रश्न सोडवण्यासाठी विशेष प्रयत्न करण्याचे सांगण्यात आले आहे.

Source: Cosmo News Desk