वहागाव | सातारा जिल्ह्यातील वाई तालुक्यातील वहागाव येथील प्रयोगशील शेतकरी पृथ्वीराज चव्हाण यांनी दुष्काळी परिस्थितीत पशुपालकांसाठी एक नवा मार्ग दाखवला आहे. कमी पावसामुळे निर्माण झालेल्या संकटावर मात करत त्यांनी स्वतःच्या पशुधनासाठी वर्षभराच्या चाऱ्याची भक्कम सोय केली आहे. श्री. चव्हाण यांचा बंदिस्त शेळी आणि शेळी-मेंढी पालनाचा व्यवसाय आहे. सध्या सातारा जिल्ह्यात पावसाचे प्रमाण अत्यंत कमी असल्याने दुष्काळी परिस्थिती निर्माण झाली आहे. अशा वेळी पशुधनासाठी हिरव्या चाऱ्याची व्यवस्था करणे मोठे आव्हान ठरत होते.

शुगर गेज ज्वारीच्या बियाण्यांचा वापर

या बिकट परिस्थितीवर मात करण्यासाठी श्री. चव्हाण यांनी उपायुक्त पशुसंवर्धन विभागाशी संपर्क साधून त्यांच्याकडून शुगर गेज या विशेष ज्वारीचे बियाणे मिळवले. त्यांनी आपल्या ६ एकर शेतजमिनीवर या शुगर गेज ज्वारीची पेरणी केली. अत्यंत अल्प पावसात आणि प्रतिकूल वातावरणातही हे पीक जोमाने आले आहे. या जातीची पाण्याची गरज कमी असल्याने दुष्काळी भागातही हे पीक भरघोस उत्पादन देते. पिकाची वाढ पाहता त्यांना एकरी अंदाजे १२ टन इतका मुबलक आणि पौष्टिक चारा उपलब्ध होईल, असा विश्वास आहे.

मुरघास व सुका चारा निर्मिती

मिळालेल्या चाऱ्याचा पुरेपूर वापर करण्यासाठी त्यांनी शास्त्रोक्त पद्धतीने मुरघास तसेच सुका चारा तयार करण्याचे नियोजन केले आहे. प्रक्रिया केलेला चारा वर्षभर टिकत असल्याने आणि पौष्टिकता कायम राहत असल्याने शेळी-मेंढी पालनाच्या व्यवसायाला चाऱ्याची टंचाई भासणार नाही. दुष्काळातही पशुधनाला हिरवा व पौष्टिक आहार मिळत राहील. जिल्ह्यातील इतर शेतकऱ्यांनी देखील पशुसंवर्धन विभागाशी संपर्क साधून शुगर गेज ज्वारीचे बियाणे मिळवावे आणि पेरणी करावी, असे आवाहन त्यांनी केले आहे.

Source: Cosmo News Desk