नाशिक | सिंहस्थ कुंभमेळ्याच्या प्रारंभाचा महत्त्वाचा टप्पा असलेला महाध्वजारोहण सोहळा अत्यंत उत्साहात संपन्न झाला. या सोहळ्याची सुरुवात म्हणून पाहिले जाणाऱ्या कार्यक्रमात राष्ट्रपती द्रौपदी मुर्मू यांच्या हस्ते रामकुंडावर ध्वजारोहण करण्यात आले. या ऐतिहासिक सोहळ्यासाठी शहरामध्ये जय्यत तयारी करण्यात आली होती आणि भाविकांमध्ये मोठा उत्साह पाहायला मिळाला.

रामकुंडावर ध्वजारोहण आणि ग्रामपरिक्रमा

सिंहस्थ कुंभमेळ्याच्या पूर्वसंध्येला शुक्रवारी जगद्गुरू रामानंदाचार्य दक्षिणपीठ, नाणीजधाम यांच्या वतीने भव्य सिंहस्थ ग्रामपरिक्रमेला अत्यंत उत्साही वातावरणात सुरुवात झाली. ही यात्रा शहराच्या प्रमुख मार्गावरून सुमारे चार तास चालली, ज्याने नाशिककरांचे पारणे फेडले. या महाध्वजारोहण सोहळ्याच्या पार्श्वभूमीवर आयोजित या ग्रामपरिक्रमेमध्ये तब्बल १२६ पथकांचा सहभाग होता. महाराष्ट्रासह देशाच्या विविध भागांतील सांस्कृतिक, धार्मिक आणि सामाजिक परंपरांचे दर्शन घडविणारे आकर्षक देखावे या परिक्रमेचे विशेष आकर्षण ठरले.

या यात्रेत जगद्गुरू श्रीमद् रामानंदाचार्य नरेंद्राचार्यजी महाराज, धर्मसम्राट ज्ञानदासजी महाराज, पंच निर्मोही अनी आखाड्याचे श्रीमहंत राजेंद्र दासजी महाराज, श्री पंच निर्वाणी अनी आखाड्याचे श्री महंत मुरलीदासजी महाराज, श्री पंच दिगंबर आखाड्याचे श्रीमंत वैष्णव दास जी महाराज व श्रीमंत माधव दाजी महाराज आणि खाकी आखाड्याचे श्रीमंत मोहनदास जी महाराज यांच्यासह विविध संत-महंतांच्या रथांनी परिक्रमेला मोठे धार्मिक अधिष्ठान प्राप्त करून दिले. वैदिक मंत्रघोष, वारकरी भजन, संतपरंपरेचे विविध देखावे, रामपंचायतन आणि अमृतकुंभ रथ या सर्व बाबींमुळे संपूर्ण धार्मिक वातावरण अतिशय भक्तिमय झाले होते.

मान्यवरांची उपस्थिती आणि त्र्यंबकेश्वर दौरा

या महत्त्वपूर्ण सोहळ्याच्या निमित्ताने अनेक मान्यवर उपस्थित राहणार आहेत. त्र्यंबकेश्वर येथे मुख्यमंत्री देवेंद्र फडणवीस यांच्या हस्ते ध्वजारोहण संपन्न झाले. नाशिक येथील मुख्य कार्यक्रमासाठी उपमुख्यमंत्री एकनाथ शिंदे, सुनेत्रा पवार यांच्यासह राज्य मंत्रिमंडळातील अनेक सदस्य उपस्थित राहणार आहेत. तसेच, राष्ट्रपती द्रौपदी मुर्मू या त्र्यंबकेश्वर येथे देखील भेट देणार असून, त्या श्री त्र्यंबकेश्वरचे दर्शन घेतील आणि कुशावर्ताची पाहणी करतील अशी माहिती समोर आली आहे.

Source: Cosmo News Desk