महाराष्ट्र | आजच्या धावपळीच्या जीवनात बदललेल्या आहाराच्या सवयी, अपुरी झोप, व्यायामाचा अभाव, मानसिक ताण आणि मोबाईलचा वाढता वापर यामुळे तरुणांच्या आरोग्यावर परिणाम होत आहे. आजार झाल्यानंतर उपचार करण्याऐवजी तरुण वयातच निरोगी जीवनशैलीची जाणीव निर्माण करणे गरजेचे आहे. याच विचारातून मुख्यमंत्री देवेंद्र फडणवीस यांच्या संकल्पनेतून ‘मुख्यमंत्री आरोग्य संवाद – जागर आरोग्याचा’ हा महत्त्वाचा उपक्रम सुरू करण्यात आला आहे. याद्वारे शिक्षणसंस्था आणि वैद्यकीय क्षेत्र एकत्र आले असून, तरुणांना आरोग्याविषयी योग्य मार्गदर्शन मिळत आहे.

उपक्रमाची व्याप्ती आणि तज्ज्ञांचा सहभाग

नवरात्रीत सुरू झालेल्या या उपक्रमांतर्गत डॉक्टरांनी रुग्णालयात वाट पाहण्याऐवजी महाविद्यालयांमध्ये जाऊन विद्यार्थ्यांशी थेट संवाद साधला आहे. वैद्यकीय महाविद्यालयांतील प्राध्यापक, विभागप्रमुख आणि वरिष्ठ तज्ज्ञांनी वैद्यकीय तसेच कृषी, अभियांत्रिकी, विज्ञान, वाणिज्य आणि कला शाखांच्या विद्यार्थ्यांशी संवाद साधला. राज्यातील सात विभागांमध्ये ९९८ सत्रांच्या माध्यमातून १ लाख ३ हजार १३३ विद्यार्थ्यांपर्यंत हा संवाद पोहोचला आहे. या सत्रांमध्ये विद्यार्थ्यांना प्रश्न विचारण्याची, शंका मांडण्याची आणि तज्ज्ञांकडून उत्तरे मिळविण्याची संधी मिळाली. भाषणांपेक्षा प्रश्नोत्तरे आणि दैनंदिन जीवनातील उदाहरणांमुळे विद्यार्थ्यांना विषय सहज समजण्यास मदत झाली.

मानसिक आरोग्य आणि आरोग्यदूत

शारीरिक आरोग्याइतकेच मानसिक आरोग्यही महत्त्वाचे असून, ताणतणाव किंवा नैराश्याविषयी बोलताना विद्यार्थी संकोच करतात. अशा वेळी मदत मागणे हा कमकुवतपणा नसून स्वतःच्या आरोग्याची जबाबदारी स्वीकारण्याचा भाग असल्याची जाणीव करून देण्यात येत आहे. मानसिक आरोग्यविषयक मदतीसाठी केंद्र शासनाची ‘टेलि-मानस’ ही १४४१६ क्रमांकावरील दूरध्वनी सेवा उपलब्ध आहे. या उपक्रमातून मिळालेली माहिती विद्यार्थी आपले मित्रमैत्रिणी आणि कुटुंबीयांपर्यंत पोहोचवून आरोग्यदूताची भूमिका बजावू शकतात. प्रतिबंध हाच खरा उपचार मानून, महाविद्यालयीन वयातच चांगल्या सवयी अंगीकारल्यास आरोग्यसाक्षर पिढी आणि सक्षम महाराष्ट्र घडविण्यास मदत होईल, असे महाराष्ट्र आरोग्य विज्ञान विद्यापीठाचे कुलगुरू डॉ. व्यंकट गिते यांनी म्हटले आहे.

Source: Cosmo News Desk