मुंबई | बृहन्मुंबई पोलीस आयुक्तालयाच्या हद्दीत शांतता व सुव्यवस्था अबाधित राखण्यासाठी महाराष्ट्र पोलीस अधिनियम, १९५१ मधील अधिकारांनुसार पोलीस उपआयुक्त (अभियान) यांनी २५ ऑक्टोबर २०२६ पर्यंत जमावबंदी आदेश जारी केला आहे. या आदेशाची अंमलबजावणी पोलीस प्रशासनाकडून केली जात असून नागरिकांना याचे पालन करण्याचे आवाहन करण्यात आले आहे.

प्रतिबंधात्मक नियम आणि अटी

जारी करण्यात आलेल्या या आदेशानुसार बृहन्मुंबई हद्दीत पाच किंवा त्यापेक्षा अधिक व्यक्तींना एकत्र जमण्यास मनाई करण्यात आली आहे. तसेच मिरवणूक काढणे, जमाव करून ध्वनिवर्धक किंवा सांगीतिक बँडचा वापर करणे यावरही प्रतिबंध घालण्यात आला आहे. याशिवाय सार्वजनिक ठिकाणी फटाके फोडण्यावर देखील निर्बंध लादण्यात आले आहेत. शहरात कायदा व सुव्यवस्था कायम राहावी हा यामागील मुख्य उद्देश आहे.

काही घटकांना विशेष सूट

या जमावबंदी आदेशातून काही गोष्टींना वगळण्यात आले आहे. यामध्ये विवाह समारंभ, विवाह प्रथेशी संबंधित इतर समारंभ, अंत्यविधी, कंपन्या, सहकारी संस्था आणि इतर संघटनांच्या कायदेशीर बैठका यांचा समावेश आहे. क्लबमधील कार्यक्रम, सामाजिक मेळावे, सहकारी व इतर संस्थांच्या नियमित कामकाजाचे कार्यक्रम, चित्रपटगृहे, नाट्यगृहे, मनोरंजनाची ठिकाणे, न्यायालये, शासकीय व निमशासकीय कार्यालये यांना सूट दिली आहे. शाळा, महाविद्याлыये, शैक्षणिक संस्था, कंपन्या, कारखाने, दुकाने व इतर आस्थापनांमधील नियमित व्यापार व व्यवसायासाठी होणाऱ्या जमावांना देखील यातून वगळण्यात आले आहे. पोलिसांनी परवानगी दिलेल्या शांततापूर्ण मार्गाने काढण्यात येणाऱ्या मोर्चांनाही या आदेशातून वगळण्यात आले असल्याची माहिती पोलीस उपआयुक्त (अभियान) अकबर पठाण यांनी दिली आहे.

Source: Cosmo News Desk