नाशिकमधील टीसीएस बीपीओमध्ये झालेल्या महिला कर्मचाऱ्यांच्या छळ प्रकरणाने आता उग्र रूप धारण केले आहे. या प्रकरणाची व्याप्ती केवळ छळापुरती मर्यादित नसून, यात आता ‘कॉर्पोरेट जिहाद’ आणि देशविघातक कारवायांचा संशय व्यक्त केला जात आहे. महाराष्ट्र एटीएसने (ATS) या प्रकरणात उडी घेतली असून दोन मुख्य संशयित आरोपी, सफी शेख आणि रजा मेमण यांना ताब्यात घेतले आहे. तपासात असे समोर आले आहे की, आरोपींनी कंपनीतील डेटा आणि महिला कर्मचाऱ्यांचा वापर करून काही संशयास्पद हालचाली केल्या होत्या का, याचा शोध घेतला जात आहे. दुसरीकडे, मुख्य आरोपी निदा खान हिच्या अटकेसाठी पोलिसांनी तिची मालमत्ता जप्त करण्याची तयारी सुरू केली आहे. निदा खानच्या कुटुंबाने असा दावा केला आहे की ती गर्भवती असून घरीच आहे, परंतु पोलीस रेकॉर्डनुसार ती अद्याप फरार आहे. राज्य सरकारने या प्रकरणाच्या चौकशीसाठी निवृत्त न्यायाधीश आणि माजी आयपीएस अधिकाऱ्यांची ४ सदस्यीय उच्चस्तरीय समिती नियुक्त केली आहे. आज राष्ट्रीय महिला आयोगाचे (NCW) पथक नाशिकमध्ये दाखल होऊन पीडित महिलांशी संवाद साधणार आहे. या प्रकरणामुळे कॉर्पोरेट विश्वात महिलांच्या सुरक्षेचा प्रश्न पुन्हा एकदा ऐरणीवर आला आहे.