मुंबई | माहिती व जनसंपर्क महासंचालनालय निर्मित ‘दिलखुलास’ आणि ‘जय महाराष्ट्र’ या कार्यक्रमांत शालेय शिक्षण व क्रीडा विभागाचे प्रधान सचिव रणजीत सिंह देओल यांची विशेष मुलाखत प्रसारित केली जाणार आहे. बदलत्या काळाच्या गरजेनुसार राज्यातील शालेय शिक्षण व्यवस्था अधिक गुणवत्तापूर्ण व विद्यार्थी-केंद्रित बनवण्यासाठी शासनाद्वारे हाती घेण्यात आलेले विविध उपक्रम, राष्ट्रीय शिक्षण धोरण २०२० नुसार अभ्यासक्रमातील बदल, पायाभूत साक्षरता व संख्याज्ञान आणि विद्यार्थ्यांच्या सर्वांगीण विकासासाठी सुरू असलेल्या प्रयत्नांची माहिती त्यांनी या मुलाखतीतून दिली आहे. ही मुलाखत निवेदिका पूनम चांदोरकर यांनी घेतली आहे.
प्रसारणाची वेळ आणि माध्यम
‘दिलखुलास’ कार्यक्रमामध्ये ही मुलाखत सोमवार, दिनांक २६ ते गुरुवार, दिनांक २९ ऑक्टोबर २०२६ या कालावधीत दररोज सकाळी ७ वाजून २५ मिनिटे ते ७ वाजून ४० मिनिटांपर्यंत आकाशवाणीच्या सर्व केंद्रांवरून प्रसारित होणार आहे. श्रोत्यांना ही मुलाखत ‘News On AIR’ या ॲपवर देखील ऐकता येणार आहे. याशिवाय, ‘जय महाराष्ट्र’ या कार्यक्रमात ही विशेष मुलाखत मंगळवार, दिनांक २७ ऑक्टोबर २०२६ रोजी रात्री ८ वाजता दूरदर्शनच्या सह्याद्री वाहिनीवर प्रसारित केली जाईल. माहिती व जनसंपर्क महासंचालनालयाच्या अधिकृत समाजमाध्यमांवर (Twitter: MahaDGIPR, Facebook: MahaDGIPR, YouTube: MaharashtraDGIPR) देखील हा कार्यक्रम पाहता व ऐकता येणार आहे.
मुलाखतीमधील प्रमुख विषय
या विशेष मुलाखतीत राष्ट्रीय शिक्षण धोरण २०२० च्या पार्श्वभूमीवर अभ्यासक्रमात करण्यात आलेल्या सुधारणा, विद्यार्थ्यांमध्ये पायाभूत साक्षरता व संख्याज्ञान निर्माण करण्यासाठी राबविण्यात येत असलेले ‘निपुण महाराष्ट्र’ अभियान यावर सविस्तर चर्चा झाली आहे. तसेच विद्यार्थ्यांचे आरोग्य, पारदर्शक शिक्षक भरती प्रक्रिया, ऑनलाइन प्रवेश व्यवस्था, सीएमश्री आदर्श शाळा, शाळा गुणवत्ता आश्वासन व मूल्यांकन आराखडा, विज्ञानविषयक उपक्रम आणि पर्यावरण संवर्धन यांसारख्या विविध महत्त्वाच्या विषयांचा समावेश आहे. शिक्षणात तंत्रज्ञानाचा प्रभावी वापर, गुणवत्तापूर्ण शिक्षणाच्या संधी, विद्यार्थ्यांमध्ये ज्ञान, कौशल्ये, मूल्ये व संस्कारांचा समतोल साधून त्यांना भविष्यातील आव्हानांसाठी सक्षम बनवणे, तसेच शिक्षण प्रक्रियेत शिक्षक व पालकांचा सहभाग वाढवणे आणि शाळांची गुणवत्ता वाढवण्यासाठी शासन करत असलेल्या प्रयत्नांची माहिती प्रधान सचिव रणजीत सिंह देओल यांनी यावेळी दिली आहे.
Source: Cosmo News Desk
